دي بعض النقط اللي جت في دماغي وحبيت أكتبها عشان الناس اللي بتقعد ساعتين مش عارفة توقف تاكسي :D
- مهما فاصلت لو المشوار يسوى حاجة معينة عمره ماحينفع يقل عنها , يعني أنت بتفاصل عشان ماتركبش بأزيد من المفروض .
-أهم حاجة أنك تدخل على السواق و أنت واثق من نفسك , وتقوله المبلغ بنبرة (هيا ماتسواش الا كده وده أخرك , عاجبك ولا مش عاجبك ) ومافيش مانع أنك تكشر في وش أمه عشان تقوي موقفك :D
وأوعى تفاصله بنبرة السؤال (ممكن والنبي توديني الحتة الفولانية وتاخد كذا ؟!) ساعتها حتفضل واقف الى الأبد.
- ولو أنت رايح حتة قريبة والعداد بيعمل أقل من 10 ريال ومش عايز تقول للسواق 5 ريال وبتاع ومش حمل غباء الأخرين وعايز تنجز وتفسي دماغك , أركب وقوله يشغل العداد , عشان كتير منهم بيستحمر وبيطلب 10ريال انشاء الله لو رايح التموينات اللي في أول الشارع.
- وخلي بالك أيام الجمعة والسبت الصبح , السواقين بيفضلوا يلفوا على الفاضي وده موقف قوة ليك , يعني لو عندك مشوار في الوقت ده أتفق مع السواق على مبلغ أقل من اللي متعود تدفعه أيام الشغل يعني المشوار أبو 15 يبقى ب 10 وأبو 10 يبقى ب 5 , طبعا المشوار أبو 5 مش حيبقى ببلاش :D حيفضل ب 5 , وخلي بالك كمان كل ما المبلغ اللي بتدفعه في أيام الشغل يزيد زود الفلوس اللي بتقللها , يعني مثلا المشوار أبو 30 ممكن يخلص ب عشريناية وهكذا..
- وفي كلام بيساعد السواق أنه يقتنع بالاتفاق , مثلا (والله يا محمد أنا روح كل يوم كده الشغل) وممكن تقول كده ويكون مكان عمرك ماروحته عادي :D وطبعا لازم تشيل الوش الخشب اللي عملته في الأول :D و دايما ردود السواقين بتبقى جملة جدلية واحدة محفظينها لبعض (لو غير اليوم أنا مافي مشكل , بس اليوم زحمة كتير) قال يعني موافق في أي يوم عادي بس النهاردة يوم غير عادي واليوم الغيرعادي ده بيتكرر كل يوم مع سواق شكل تحس كأنك بتتفرج على فيلم ألف مبروك :D , طبعا متاخدش في بالك الكلمتين اللي هوا حافظهم دول وعيد عليه الكلام تاني لأن السواق بيقول الكلمتين دول عشان الناس الخبؤات اللي شخصيتهم مهزوزة يركبوا.
- وكمان طريقة تانية من طرق الاقناع أنك تقول السعر ولو طلب زيادة تقوم مبتسم ابتسامة صفراء وتقوم عامله التحيه (أشبه بالتحية العسكرية) وكأنك عايز تقوله (أنت حمان ياحمان , شكلك لسه شغال سواق تاكسي أول أمبارح) وتبص ورا للتكسه اللي بعده وتمشي مترين ورا كده كأنك قلبت السواق الحمار اللي أنت وقفته , ساعتها حيحس بغلطته ويقولك تعالى أركب.
-وكمان في سواقين بتيجي بالهزار , يعني مثلا مرة كنت طالع من مطعم وباتفق مع سواق على المبلغ وقولتله أنت بتكسب كتير يامحمد وأنا نفر مسكين ومافي متجوز ومضيع فلوسي على الأكل :D ووصلني حسب الأتفاق , يعني لازم تشزف السواق ايه موده وتقنعه.
-وخلي بالك أن معظم السواقين أي مبلغ تقوله لازم يزود عليه , حتى مرة مشواري كان يسوى 15 والسواق قالي شوية خليهم 25 وأنا كنت تعبان وعايز أنجز وأروح وركبت معاه , وطلع مش عارف الحتة اللي أنا رايحها فين أساسا !!! وأتصل بواحد يعرف منه المكان ومافهمش منه وسألني على المكان (ساعتها كنت عايز أرزعه قفا ألزق وشه في الدركسيون).
-وأحسن من كل الهري اللي بهري فيه ده أنك تجيب عربية :D
شكرا...
الكاتب : س س
ليست هناك تعليقات:
إرسال تعليق